"'त्यांनी' स्वतःच्या मुलाला आधी रस्त्यावर उतरवावं"; सुजात आंबेडकरांचे थेट राज ठाकरेंना आव्हान

"'त्यांनी' स्वतःच्या मुलाला आधी रस्त्यावर उतरवावं"; सुजात आंबेडकरांचे थेट राज ठाकरेंना आव्हान

मुंबई : राज्यात सध्या मनसे प्रमुख राज ठाकरे यांच्या भोंग्याच्या वक्तव्यावरून राजकारण सुरु झाले असल्याचे पाहायला मिळत आहे.सत्ताधारी, विरोधक आणि मनसे पक्षातील अनेक नेत्यांनी राज यांच्या वक्तव्याला तीव्र विरोध दर्शवला आहे.

त्यातच वंचित बहुजन आघाडीचे अध्यक्ष प्रकाश आंबेडकर यांचे चिरंजीव सुजत आंबेडकर यांनीदेखील राज ठाकरेंवर टीका केली आहे. त्यांनी आता चक्क राज ठाकरे यांना थेट आव्हान देत राज्यात जर दंगलीचा पेटव्याच्या असतील तर अगोदर स्वतःच्या मुलाला रस्त्यावर उतरावा असे म्हटले आहे.

सुजात आंबेडकर यांनी काही दिवसांपूर्वी राज ठाकरेंचे सुपुत्र आणि मनसे नेते अमित ठाकरे यांना हनुमान चालिसा म्हणून दाखवण्याचे खुले आव्हान दिले होते. ही घटना ताजी असतानाच सुजात आंबेडकरांनी पुन्हा एकदा मनसेवर टीकास्त्र सोडलं आहे. अमित राज ठाकरे यांना हनुमान चालिसा म्हणण्यासाठी पर्सनल ईव्हीटेशन दिलं नव्हतं, असे ते म्हणाले. दंगल पेटवणारे हे उच्चवर्णीय, उच्चवर्गीय ब्राम्हण असतात आणि रस्त्यावर उतरणारी बहुजन मुलं असतात. राज ठाकरे यांना दंगल पेटवायची असेल, तर त्यांनी स्वतःच्या मुलाला आधी रस्त्यावर उतरवावं आणि स्वतःच्या मुलाला रस्त्यावर उतरवणार नसाल तर बहुजन पोरांनाही उतरवू नका, असा थेट इशारा सुजात आंबेडकर यांनी दिला आहे.

अमित ठाकरे यांना स्वतः पर्सनल ईव्हीटेशन दिलं नव्हतं, की तुम्ही येऊन हनुमान चालिसा म्हणा. मेटाफर किंवा पोएट्री आपण म्हणू शकतो, त्याच्या म्हणण्याचा अर्थ असा होता, की आपण आतापर्यंत किती दंगली बघितल्या, बाबरी मशिद असो किंवा भीमा कोरेगाव असो, दंगल पेटवणारे हे सहसा उच्चवर्णीय, उच्चवर्गीय ब्राम्हण असतात आणि त्यांच्या वक्तव्यावरुन प्रभावित होऊन प्रत्यक्ष रस्त्यावर उतरणारे हे बहुजन असतात, माझं राज ठाकरेंना एवढंच म्हणणं होतं की तुम्हाला दंगल पेटवायची असेल किंवा हनुमान चालिसा म्हणायला लावायची असेल, तर बहुजन मुलांच्या आधी स्वतःच्या मुलाला रस्त्यावर उतरवा आणि तुम्ही स्वतःच्या मुलाला रस्त्यावर उतरवणार नसाल तर बहुजन पोरांनाही उतरवू नका, असे सुजात आंबेडकर म्हणाले.

माझं वक्तव्य पटल्याचं अनेक जणांनी मला सांगितलं. कितीतरी मनसेच्या पदाधिकाऱ्यांनी राजीनामा दिला आहे. अनेक मुस्लिम बांधव मनसेचा राजीनामा देत बाहेर पडले आहेत. अनेक जणांनी राज ठाकरेंच्या वक्तव्याला विरोधही केला आहे, असेही त्यांनी यावेळी म्हटले आहे.

कोरोनाबाधितांची संख्या कमी झाल्यामुळे केईएममधील सशुल्क सेवा विभाग सुरू

कोरोनाबाधितांची संख्या कमी झाल्यामुळे केईएममधील सशुल्क सेवा विभाग सुरू

मुंबई: कोरोनाबाधितांची संख्या कमी झाल्यामुळे केईएमधील रुग्णांसाठी पुन्हा एकदा सशुल्क सेवा सुरू करण्यात येणार असल्यामुळे मध्यमवर्गातील रुग्णांना या सेवेचा फायदा घेता येणार आहे.

स्टेट बँक ऑफ इंडियाने (एसबीआय) केईएमध्ये दिलेल्या देणगीच्या माध्यमातून एक स्वतंत्र विभाग तयार करण्यात आला आहे. या विभागात प्रतिखाट २०० रुपये शुल्क आकारून रुग्णांना सेवा दिली जाते. ही सेवा जवळपास तीन दशकांहूनही अधिक काळ सुरू आहे. रुग्णालयातील अन्य रुग्णांप्रमाणेच सर्व उपचार या रुग्णांना मिळतात. तेथे रुग्णांना राहण्याची आणि नातेवाईकांना थांबण्यासाठी सोय असते.

हा विभाग कोरोना काळात कार्यरत नव्हता. कोरोनाबाधितांची संख्या वाढल्यावर एसबीआय विभागात मज्जारज्जूंशी संबंधित आजारांचा विभाग (न्युरोलॉजी) हलविण्यात आला होता. जुलै २०२१ मध्ये कोरोनाबाधितांची संख्या कमी झाल्यावर हा विभाग पुन्हा सुरू करण्याचा विचार सुरू झाला. केईएमध्ये काही विभाग रुग्णांसाठी सशुल्क उपलब्ध करण्याचा प्रस्तावही त्यावेळी मांडण्यात आला आल्याचे केईएम रुग्णालयाचे माजी अधिष्ठाता डॉ. हेमंत देशमुख यांनी सांगितले.

केईएमध्ये पैसे आकारून प्रत्येक वॉर्डमध्ये दोन खोल्यांमध्ये सेवा देण्याची सुविधा होती. यात एका खोलीत एक किंवा दोन खाटा होत्या. यामध्येही अनेक मध्यमर्गीय रुग्ण उपचार घेत होते. कोरोनाकाळात खाटांची संख्या कमी पडायला लागल्यामुळे हे विभाग बंद केले. त्यावेळी रुग्णांचा भार असल्यामुळे अशी स्वतंत्र सेवा देणे शक्य नव्हते. या खोल्यांचा वापर पीपीई कीट घालणे आणि काढणे यासाठी केला जाऊ लागला. कोरोना कमी झाल्यानंतर या खाटाही सुरू करण्याचे प्रस्तावित केले होते, असे देशमुख यांनी सांगितले. आता पुन्हा एसबीआय विभाग सुरू केला जाणार आहे. यामध्ये १७ खाटा असतील. हा विभाग पुन्हा सुरू करण्यासाठी आवश्यक सुविधा आणि अन्य उपाययोजना केल्या जात असल्याचे पालिकेचे अतिरिक्त आयुक्त सुरेश काकाणी यांनी सांगितले.

एकीकडे खासगी रुग्णालयातील दर परवडणारे नाहीत आणि दुसरीकडे मोफत सेवा देणाऱ्या पालिकेच्या रुग्णालयांमधील गर्दीमुळे मध्यम वर्गाची कुचंबणा होते. एसबीआय विभागामध्ये अनेक मध्यमवर्गीय रुग्ण दाखल होऊन सेवा घेतात. परंतु क्ष किरण, सोनोग्राफी, रक्ताच्या तपासण्या करण्यासाठी या रुग्णांना अन्य रुग्णासोबतच रांगेत राहावे लागत होते. हे गैरसोयीचे असल्यामुळे रुग्ण अनेकदा तक्रार करायचे. या सोयीदेखील पैसे आकारून उपलब्ध कराव्या. खरतर मध्यमवर्गीयांसाठी खासगी रुग्णालयाच्या तुलनेत कमी पैसे आकारून सेवा देणारी स्वतंत्र व्यवस्था निर्माण करणे आवश्यक आहे. ही सध्या शहराची गरज असल्याचे मत पालिकेच्या प्रमुख रुग्णालयाचे माजी संचालक डॉ. अविनाश सुपे यांनी व्यक्त केले.

श्री विठ्ठल मंडळ-ठाणे जिल्हास्तरीय कबड्डी स्पर्धा-२०२२. संघर्ष मंडळ महिलांत उपांत्य फेरीत, तर ओम् कबड्डी, जय हनुमान पुरुषांत उपांत्यपूर्व फेरीत दाखल.

श्री विठ्ठल मंडळ-ठाणे जिल्हास्तरीय कबड्डी स्पर्धा-२०२२.

 संघर्ष मंडळ महिलांत उपांत्य फेरीत, तर ओम् कबड्डी, जय हनुमान पुरुषांत उपांत्यपूर्व फेरीत दाखल.

     ठाणे दि. ०९ :- संघर्ष मंडळाने श्री विठ्ठल क्रीडा मंडळ आयोजित महिलांत उपांत्य फेरीत धडक दिली. पुरुषांत ओम कबड्डी, जय हनुमान मंडळाने उपांत्यपूर्व फेरी गाठली. ठाण्याच्या लोकमान्य नगरात सुरू असलेल्या महिलांच्या उपांत्यपूर्व सामन्यात ठाण्याच्या संघर्ष मंडळाने नवी मुंबईच्या रा.फ.नाईक या बलाढ्य संघाला २८-२५ अशी धूळ चारत उपांत्य फेरी गाठली. आक्रमक खेळाची सुरुवात करीत पहिल्याच डावात १८-११ अशी आघाडी घेणाऱ्या संघर्षने दुसऱ्या डावात सावध खेळ करीत ही आघाडी टिकविली आणि सामना आपल्या बाजूने झुकविला. देवयानी पाटील,स्नेहा म्हात्रे, प्रतीक्षा मारकड यांच्या चढाई-पकडीचा खेळ या विजयात महत्वाचा ठरला. तनुजा गोळे, तृप्ती मोरे यांच्या खेळाचा आज प्रभाव पडला. या अगोदर झालेल्या महिलांच्या सामन्यात ठाण्याच्या होतकरू मंडळाने ५-५ चढायांच्या डावात चिंतामणी स्पोर्ट्स संघावर ३१-२७(९-५)असा पाडाव करीत उपांत्यपूर्व फेरी गाठली. प्राजक्ता पुजारी,चैताली बोराडे, सायली शिंदे, वृषाली गाला यांच्या चतुरस्त्र खेळाने होतकरूने पूर्वार्धात १७-०९अशी मोठी आघाडी घेतली होती.पण उत्तरार्धात रेखा चिकणे, रुचिता मोडक, प्रतीक्षा जाधव, वैष्णवी गेडाम यांनी आपला खेळ उंचावत चिंतामणीला २२-२२ अशी बरोबरी साधून दिली. पण विजय मात्र त्यांच्या हातून निसटला. जादा डावात होतकरून बाजी मारली.

प्रथम श्रेणी स्थानिक गटात ओम कबड्डी कल्याण संघाने मध्यांतरातील ०७-१० अशी ३गुणांची पिछाडी भरून काढत अश्वमेध स्पोर्ट्सचा २०-१५ असा पाडाव करीत उपांत्यपूर्व फेरीत प्रवेश केला. जयंत काते, जय गिरीधर यांच्या अष्टपैलू खेळाला या विजयाचे श्रेय जाते. अश्वमेधच्या महेश शेलार, मयूर कदम यांना पूर्वार्धातील खेळातील चमक उत्तरार्धात न दाखविता आल्याने पराभवाचा सामना करावा लागला. काल्हेरच्या जय हनुमान संघाने ठाण्याच्या मावळी मंडळाला २८-२५ असे नमवित उपांत्यपूर्व फेरी गाठली. पूर्वार्धात १०-१८ अशा ८गुणांनी पिछाडीवर पडलेल्या जय हनुमानने उत्तरार्धात जोशपूर्ण खेळ करीत बाजी पलटविली. गौरव पाटीलचा अष्टपैलू खेळ त्याला वैभव पाटीलची मिळालेली उत्तम साथ यामुळे जय हनुमानने ही किमया साधली. मावळीच्या ज्ञानेश भिलारे, अभिजित घरे यांचा खेळ उत्तरार्धात थोडा कमी पडला. इतर सामन्यांचा निकाल संक्षिप्त :- महिला गट १)छत्रपती शिवाजी मंडळ वि वि स्फूर्ती सेवा मंडळ(४५-३८); २)संकल्प मंडळ वि वि अश्वमेध फाउंडेशन (२३-१५). प्रथम श्रेणी स्थानिक पुरुष गट :-१) छत्रपती शिवाजी मंडळ वि वि नवी मुंबई प्रबोधिनी(३३-२७); २)श्री हनुमान मंडळ वि वि ओम न्यूवर्तक स्पोर्ट्स(३३-२६).

सगळेच प्रश्न आम्ही सोडवायचे, मग लोकसभा, राज्यसभा काय करणार?, सरन्यायाधीश भडकले

सगळेच प्रश्न आम्ही सोडवायचे, मग लोकसभा, राज्यसभा काय करणार?, सरन्यायाधीश भडकले

मुंबई : कधी निवडणूक प्रक्रियेतील सुधारणेचा विषय, तर कधी लोकसंख्या नियंत्रणाचा मुद्दा. सर्व समस्या घेऊन लोक उठसूठ कोर्टापुढे येतात. सगळेच प्रश्न जर आम्ही सोडवाोयचे, तर मग तुम्ही सरकार का निवडून दिले आहे?

लोकसभा, राज्यसभा ही सभागृहे काय कामे करणार? असा खडा सवाल याचिकाकर्त्याला करीत सर्वोच्च न्यायालयाने खटल्यांचा ताण वाढल्याबद्दल गुरुवारी तीव्र नाराजी व्यक्त केली. घुसखोरांना हद्दपार करण्याच्या याचिकेवर लवकर सुनावणी घ्या, अशी विनंती याचिकाकर्ते वकिल अश्विनी उपाध्याय यांनी केली. त्यावर सरन्यायाधीश एन. व्ही.

रमण्णा यांच्या खंडपीठाने हा नाराजीचा सूर आळवला. तसेच याचिकाकर्त्याला याबाबत सरकारकडे दाद मागण्याचा सल्ला दिला. सगळे प्रश्न सर्वोच्च न्यायालयात सुटणार असतील, मग लोकसभा, राज्यसभा काय करणार? असा प्रश्न सरन्यायाधीशांनी केला.

किरीट सोमय्या आणि नील सोमय्यांवर फसवणुकीचा गुन्हा दाखल, माजी सैनिकांची रात्री उशीरा पोलीस ठाण्यात तक्रार

किरीट सोमय्या आणि नील सोमय्यांवर फसवणुकीचा गुन्हा दाखल, माजी सैनिकांची रात्री उशीरा पोलीस ठाण्यात तक्रार

मुंबई : भाजपचे नेते माजी खासदार किरीट सोमय्या (Kirit Somaiya) आणि त्यांचे पुत्र नील सोमय्या (Neil Somaiya) आणि इतर यांच्यावर ट्रॉम्बे पोलीस ठाण्यात फसवणुकीचा गुन्हा दाखल झाला आहे.

माजी सैनिक बबन भोसले यांनी रात्री उशिरा ट्रॉम्बे पोलीस ठाण्यात ही तक्रार दिली.

काल संध्याकाळी अप्पर पोलीस आयुक्त संजय दराडे यांची भेट

कलम 420, 406, 34 अंतर्गत पोलिसांनी हा गुन्हा दाखल केला आहे. शिवसेना खासदार संजय राऊत यांचे भाऊ आमदार सुनील राऊत यांनी भोसले आणि इतर शिवसेना पदाधिकारी यांच्यासह काल संध्याकाळी अप्पर पोलीस आयुक्त संजय दराडे यांची भेट घेतली होती. त्यानंतर भोसले यांनी दिलेल्या तक्रारीवरून पोलिसांनी हा गुन्हा दाखल केला आहे. INS विक्रांत ही युद्धनौका वाचवण्यासाठी नागरिकांकडून गोळा केलेल्या निधीत कोट्यवधींचा अपहार केल्याचा आरोप सोमय्या पिता-पुत्रांवर करण्यात आला आहे. माजी सौनिक बबन भोसले यांच्या तक्रारीवरुन ट्रॉम्बे पोलीस ठाण्यात हा गुन्हा दाखल करण्यात आला आहे. त्यामुळे किरीट सोमय्या आणि नील सोमय्या यांच्या अडचणी वाढणार असल्याचं बोललं जातंय.

संजय राऊतांचा किरीट सोमय्यावर आरोप, आयएनएस विक्रांतसाठी जमा केलेले पैसे राज्यपाल कार्यालयात पोहोचले नाहीत!

शिवसेना आणि महाविकास आघाडीच्या नेत्यांवर सातत्याने भ्रष्टाचाराचे आरोप करणारे भाजपचे माजी खासदार किरीट सोमय्या अडचणीत सापडण्याची शक्यता आहे. शिवसेना खासदार संजय राऊत यांनी किरीट सोमय्यांवर नव्याने आरोप करत 'आएनएस विक्रांत फाइल्स' उघड केली. संजय राऊत यांनी काल पत्रकार परिषदेत म्हटले की, आयएनएस विक्रांत वाचवण्यासाठी जमा करण्यात आलेला निधी हा राज्यपालांकडे सुपूर्द करण्यात येणार असल्याचे सोमय्यांनी म्हटले होते. आरटीआय कार्यकर्ते विरेंद्र उपाध्ये यांनी राज्यपाल कार्यालयाकडून याबाबत ही माहिती मागवली होती. मात्र, राज्यपाल कार्यालयात असा कोणताही निधी मिळाला नसल्याची माहिती राज्यपाल कार्यालयाने दिली असल्याचे राऊत यांनी म्हटले. माहिती अधिकार कायद्यांतर्गत मागवण्यात आलेल्या माहितीतून ही बाब समोर आली असल्याचे शिवसेना खासदार संजय राऊत यांनी म्हटले. हा देशद्रोहीपणा असून त्याचा तपास केंद्रीय संस्थांनी करावा असे आव्हानही राऊत यांनी केले. सोमय्या हे सीए असल्यामुळे असा पैसा कसा पचवायचे याची त्यांनी माहिती असल्याचेही राऊत यांनी म्हटले. या प्रकरणी महाराष्ट्र सरकारने कारवाई करावी अशी मागणी त्यांनी केली.

पुन्हा दूधाचे दर वाढणार; अमूलने दिले थेट संकेत

पुन्हा दूधाचे दर वाढणार; अमूलने दिले थेट संकेत

मुंबई : दुधाचे दर वाढून महिना उलटत नाही तोच आता पुन्हा दरवाढीची टांगती तलवार सामान्यांच्या मानगुटीवर उभी ठाकली आहे. पंधरा दिवसांत इंधनाच्या दरांनी मोठी उसळी घेतलेली असताना आता सर्वच जीवनावश्यक वस्तूंच्या किंमती वाढू लागल्या आहेत.

आता पुन्हा दुधाच्या किंमती वाढण्याचे संकेत खुद्द या मार्केटचा लीडर असलेल्या अमूलने दिले आहेत.

गेल्या महिन्यात अमूल, गोवर्धन, सोनाई यांसह सर्वच दूध कंपन्यांनी दुधाच्या दरात लीटरमागे दोन रुपयांची वाढ केली होती. परंतू महिनाभरात पुन्हा वाढ होण्याची शक्यता आहे. जुलै २०२१ पासून सर्वच खर्चामध्ये ८ ते ९ टक्के वाढ झाली आहे. आता पुन्हा इंधनाचे दर वाढू लागले आहेत.

ऊर्जा, लॉजिस्टिक आणि पॅकेजिंग खर्चात वाढ झाल्यामुळे अमूल दुधाच्या किमती पुन्हा एकदा वाढू शकतात, असे अमूल कंपनीच्या अधिकाऱ्यांनी मंगळवारी सांगितले. मात्र, यावेळी दर किती वाढणार हे त्यांनी स्पष्ट केले नाही. अमूलचे एमडी आरएस सोधी यांनी प्रसारमाध्यमांशी संवाद साधताना सांगितले की, आता किंमती कमी होऊ शकत नाहीत परंतु वाढतील. सहकारी संघाने गेल्या दोन वर्षांत अमूल दुधाच्या दरात आठ टक्क्यांनी वाढ केली आहे. यात गेल्या महिन्यात दुधाच्या दरात प्रतिलिटर दोन रुपयांनी वाढ झाली आहे.

सोधी म्हणाले की, महामारीच्या काळात दुधापासून शेतकऱ्यांचे उत्पन्न प्रतिलिटर चार रुपयांनी वाढले आहे. त्याचबरोबर अनेक अडचणींमुळे कंपनीचा नफा कमी झाला आहे. परंतु नफावसुली हे सहकारी संस्थेचे मुख्य उद्दिष्ट नाही. अमूलला मिळणाऱ्या एक रुपयापैकी ८५ पैसे शेतकऱ्यांच्या खात्यात जातात.

मुंबई विद्यापीठाच्या ठाणे उपकेंद्राला धर्मवीर आनंद दिघे यांचे नाव देण्याचा निर्णयठाणे

मुंबई विद्यापीठाच्या ठाणे उपकेंद्राला धर्मवीर आनंद दिघे यांचे नाव देण्याचा निर्णय

ठाणे :- मुंबई विद्यापीठाच्या ठाणे उपकेंद्राला धर्मवीर आनंद दिघे यांचे नाव देण्याला विद्यापीठाच्या व्यवस्थापन परिषदेच्या बैठकीत मान्यता देण्यात आली आहे. ठाणे  आणि कल्याण या दोन्ही उपकेंद्रांना हेच नाव कायम ठेवण्याबाबत देखील या बैठकीत एकमत झाले आहे. मुंबई विद्यापीठाचे प्र-कुलगुरू रवींद्र कुलकर्णी यांनी मंत्री एकनाथ शिंदे यांची भेट घेऊन निर्णयाचे हे पत्र त्यांना सुपूर्द केले. 

धर्मवीर आनंद दिघे यांचे ठाणे शहरातील सर्वांगीण योगदान लक्षात घेऊन ठाणे शहरात बालकुम परिसरात तयार करण्यात आलेल्या मुंबई विद्यापीठाच्या उपकेंद्राला त्यांचे नाव देण्यात यावे अशी शिफारस राज्याचे नगरविकास मंत्री तथा ठाणे जिल्ह्याचे पालकमंत्री एकनाथ शिंदे यांनी विद्यापीठाला केली होती. तशी मागणी करणारे  पत्रच त्यांनी विद्यापीठाला लिहिलं होतं.

याबाबत मुंबई विद्यापीठाच्या व्यवस्थापन परिषदेच्या झालेल्या बैठकीत धर्मवीर आनंद दिघे यांचे ठाणे जिल्ह्याच्या राजकीय, सामाजिक, सांस्कृतिक, शैक्षणिक आणि धार्मिक क्षेत्रातील योगदान पहाता त्यांचेच नाव या उपकेंद्राला देणे योग्य ठरेल याबाबत समितीच्या सदस्यांचे एकमत झाले. याशिवाय मुंबई विद्यापीठाच्या कल्याण येथील उपकेंद्राला देखील हेच नाव कायम ठेवण्याचे देखील या बैठकीत निश्चित करण्यात आले आहे. 

यावेळी बोलताना शिंदे यांनी 'गुरुवर्य धर्मवीर आनंद दिघे यांचे नाव विद्यापीठाच्या ठाणे केंद्राला दिले जाणे हा त्यांचा सन्मान असून त्यांनी शैक्षणिक क्षेत्रात केलेल्या योगदानाचा हा गौरव असल्याचे मत व्यक्त केले. दिघे साहेबानी आयुष्यभर अनेक गरीब आणि गरजू विद्यार्थांना महाविद्यालयात प्रवेश मिळावा यासाठी विशेष प्रयत्न केले. जिल्ह्यातील 10 वीच्या विद्यार्थ्यांना बोर्डाच्या परिक्षेआधी सराव करता यावा यासाठी सराव परीक्षांचे आयोजन केले. गरीब मुलांना शिक्षण घेणे शक्य व्हावे यासाठी दरवर्षी शैक्षणिक साहित्याचे वाटप केले. त्यांच्या याच कार्याची दखल मुंबई विद्यापीठाने घेतली याचा आज विशेष आनंद होत असल्याचे मत शिंदे यांनी व्यक्त केले'. 

धर्मवीर आनंद दिघे यांचे नाव विद्यापीठाच्या उपकेंद्राला देण्यात यावे यासाठी सिनेट सदस्य तथा ठाण्यातील सी.डी. देशमुख संस्थेचे संचालक श्री. महादेव जगताप यांनी विशेष प्रयत्न केले. लवकरच या दोन्ही उपकेंद्रांचा नामकरण कार्यक्रम मान्यवरांच्या उपस्थितीत संपन्न होईल असे विद्यापीठाच्या वतीने स्पष्ट करण्यात आले आहे.