भारतीय रेल्वेने कोरोना काळात स्क्रॅप विकून कमावले 391 कोटी रुपये

नवी दिल्ली । कोरोनामुळे, जेथे 2020 मध्ये घोषित केलेल्या लॉकडाऊनमुळे प्रवासी गाड्या पूर्णपणे ठप्प झाल्या होत्या, दुसरीकडे, मध्य रेल्वेने याच कालावधीत रेल्वे परिसरात असलेल्या कचऱ्यापासून कोट्यवधी रुपयांची कमाई केली आहे.

मध्य रेल्वेने जारी केलेल्या आकडेवारीनुसार, 2020-21 मध्ये मध्य रेल्वेने कचऱ्यापासून 391 कोटी रुपयांपेक्षा जास्त कमाई केली आहे.

मध्य रेल्वेला 391 कोटी रुपयांपेक्षा जास्त उत्पन्न मिळते 

मध्य रेल्वेचे मुख्य जनसंपर्क अधिकारी शिवाजी सुतार म्हणाले की,'लॉकडाऊन दरम्यान, मध्य रेल्वेने विविध रेल्वे परिसरातील कचरा विकून 391 कोटी रुपयांहून अधिक कमाई केली आहे, यामुळे रेल्वे परिसर स्वच्छ ठेवण्यात खूप मदत झाली आहे. यामध्ये मध्य रेल्वेच्या अनेक विभागांचे योगदान अत्यंत महत्त्वाचे ठरले आहे.

मध्य रेल्वेने सुरू केले झिरो स्क्रॅप मिशन 

वास्तविक, मध्य रेल्वेने झिरो स्क्रॅप मिशन सुरू केले आहे, ज्या अंतर्गत मध्य रेल्वेचे प्रत्येक विभाग, कारखाना आणि शेड स्क्रॅप सामग्रीपासून मुक्त असल्याची खात्री करण्यात आली आहे. या स्क्रॅपमध्ये स्क्रॅप रेल, कायमस्वरूपी साहित्य, खराब झालेले डबे, वॅगन आणि लोकोमोटिव्ह इ. सामील आहेत. 8.65 कोटी रुपयांच्या उत्पन्नासह मध्य रेल्वेने ई-लिलावाद्वारे या साहित्याची विल्हेवाट लावली आहे.

माहितीनुसार, मध्य रेल्वेने 2020-21 मध्ये कचऱ्याद्वारे मिळवलेली रक्कम गेल्या 15 वर्षांतील सर्वाधिक आहे. याचा एक फायदा असा झाला की, लॉकडाऊन दरम्यान प्रवासी गाड्या बंद केल्यामुळे रेल्वेला झालेल्या नुकसानाची भरपाई करण्यात मदत झाली. 2020-21 दरम्यान विक्रमी कमाई केल्यानंतर आता मध्य रेल्वेने 2021-22 साठी 400 कोटी स्क्रॅप विक्रीचे लक्ष्य ठेवले आहे.

गजानन काळे अडचणीत; नवी मुंबई पोलिसांकडून सर्च ऑपरेशन सुरू

नवी मुंबई : नवी मुंबईतील मनसेचे नेते आणि शहराध्यक्ष गजानन काळे (MNS Navi Mumbai chief Gajanan Kale) यांच्या अडचणीत आता वाढ होताना दिसत आहे. गजानन काळे यांच्या विरोधात त्यांच्या पत्नीने दाखल केलेल्या तक्रारीनंतर सोमवारी शिवसेना (Shiv Sena), राष्ट्रवादी काँग्रेसच्या (NCP) महिला कार्यकर्त्यांनी आंदोलन करत तात्काळ अटकेची मागणी केली. त्यानंतर आता नवी मुंबई पोलिसांकडूनही (Navi Mumbai Police) गजानन काळे विरोधात शोधमोहिम हाती घेण्यात आली आहे त्यामुळे गजाजन काळे यांना कुठल्याही क्षणी अटक होण्याची शक्यता वर्तवण्यात येत आहे.

सोमवारी नवी मुंबईत राज्याचे गृहमंत्री दिलीप वळसे पाटील आले होते त्यावेळी त्यांना गजानन काळे प्रकरणारवर विचारले असता त्यांनी म्हटलं, या प्रकरणी पोलिसांना कारवाई करण्याचे आदेश दिले आहेत. त्यानंतर आता पोलिसांकडून सर्च ऑपरेशन सुरू करण्यात आल्याचं वृत्त मिड्डे ने दिलं आहे. त्यामुळे गजानन काळे यांच्यावर अटकेची टांगती तलवार असल्याचं दिसत आहे. नवी मुंबईत मनसेच्या गोटात खळबळ, गजानन काळेंवर पत्नीकडून गुन्हा दाखल गजानन काळे यांच्या पत्नीने नेरूळ पोलीस ठाण्यात तक्रार दाखल करत म्हटलं आहे की, गजानन काळे गेल्या काही वर्षांपासून आपल्याला मारहाण करत असून जातीवाचक शिवीगाळ सुद्धा करतो.

इतकेच नाही तर त्याचे बाहेरील महिलांसोबत संबंध असल्याचंही तक्रारीत म्हटलं आहे. आमचं लग्न 2008 मध्ये झालं आणि लग्नानंतर 15 दिवसांनी गजानन माझ्यासोबत किरकोळ घरगुती कारणांवरुन तसेच माझा सावळा रंग, जात यावरुन टोमणे मारत असल्याचंही तक्रारीत म्हटलं आहे. शिवसेनेकडून अटकेची मागणी शिवसेनेच्या नेत्या आणि विधानपरिषदेच्या उपसभापती नीलम गोऱ्हे यांनीही नवी मुंबई पोलिसांना पत्र लिहून गजानन काळेला तात्काळ अटक करण्याची मागणी केली आहे. तसेच आरोपी विरुद्ध असणारे पुरावे उपलब्ध करुन घ्यावेत आणि आरोपीला कठोर शिक्षा होईल अशा पद्धतीने चौकशी करुन लवकरात लवकर चार्जशीट न्यायालयात दाखल करावी असंही त्यांनी पत्रात म्हटलं आहे.

मोनोरेलचे मुख्य कार्यकारी अधिकारी एसीबीच्या जाळयात अडकला

मुंबई : कंत्राटदार कंपनीकड़ून २० लाख रूपयांची लाच मागितल्याप्रकरणी मोनोरेलचे मुख्य कार्यकारी अधिकारी (सीओओ) डॉ. डी. एल.एन. मुर्ती लाच लुचपत प्रतिबंधक विभागाच्या (एसीबी) जाळयात अडकले आहे. याप्रकरणी एसीबीने गुुन्हा नोंदवत अधिक तपास सुरु केला आहे.

एसीबीने दिलेल्या माहितीनुसार, तक्रारदार यांची फॅसिलिटी मॅनेजमेंट कंपनी असून कंपनीला मुंबई मोनोरेल प्रकल्पाअंतर्गत साफसफाई, हाउसकिपींग, मेंटनन्स, कस्टमर सर्व्हिसचे जानेवारी २०१९ ते ऑगस्ट २०२० पर्यंतचे कंत्राट मिळाले होते. ऑगस्ट २०२० रोजी कंत्राटाप्रमाणे काम पूर्ण केले. ठरल्याप्रमाणे कामाचे बिल २ कोटी १० लाख तसेच २२ लाख गँरंटी रक्कम अदा करण्यात होती. त्यापैकी, ४० लाख रूपयांचे बिल आणि ११ लाख गँरंटी रक्कम मुंबई मोनोरेलकड़े थकीत होते.

मूर्ती यांनी तक्रारदार यांची फाईल स्वतःकड़े अडकवून २० लाख रूपयांची मागणी केली. याप्रकरणी तक्रारदाराने एसीबीकड़े धाव घेतली. गेल्या महिन्यात २ जुलै रोजी एसीबीने केलेल्या पडताळणीत मूर्ती यांनी पैसे मागितल्याचे स्पष्ट झाले. त्यानुसार, सोमवारी याप्रकरणी भ्रष्टाचार प्रतिबंधक अधिनियम १९८८ च्या कलम ७ प्रमाणे गुन्हा नोंदविण्यात आला आहे. या कारवाईमुळे एकच खळबळ उडाली आहे. यात, मूर्ती यांच्या मालमत्तेची कुंडलीही एसीबीकड़ून काढण्यात येत आहे.

एअर फोर्सचं विमान 120 नागरिकांना घेऊन भारतात दाखल, भारत माता की जयच्या घोषणेनं मायभूमीत स्वागत

नवी दिल्ली: अफगाणिस्तानवर तालिबाननं कब्जा मिळवल्यानंतर जगातील विविध देशांनी तिथे असणारे आपले नागरिक सुरक्षितपणे बाहेर काढण्यास सुरुवात केलीय. अफगाणिस्तान तालिबानच्या ताब्यात केल्यानंतर भारत सरकारने तेथून भारतीय नागरिकांना सुरक्षित देशात परत आणण्यास सुरुवात केली आहे. मंगळवारी सकाळी भारतीय हवाई दलाचे विमान 120 भारतीयांना घेऊन गुजरातच्या जामनगर येथे उतरलं. काबूल आंतरराष्ट्रीय विमानतळावरून या विमानाने उड्डाण केलं होतं.

120 भारतीय परतले

भारतीय हवाई दलाच्या C-17 विमानातून 120 भारतीय नागरिकांना घेऊन काबूल येथून विमान आज सकाळी भारताकडे रवाना झाले होते.

गुजरातमधील जामनगर विमानतळावर हे विमान उतरलं. मायदेशी परत आणले गेलेले सर्व अफगाणिस्तानातील भारतीय राजदूत कार्यालयाचे कर्मचारी, सुरक्षा कर्मचारी होते. याशिवाय भारतीय पत्रकारांना देखील माघारी करण्यात आलं आहे. गुजरातच्या जामनगर येथे या विमानातून मायदेशी परतलेल्या नागरिकांचं जोरदार स्वागत करण्यात आलं.

जल्लोषात स्वागत

अफगाणिस्तानातून परत आलेल्या लोकांना हार घालून त्यांचे स्वागत करण्यात आलं. तिथून बस द्वारे त्यांना पुढे पाठवण्यात आले. यावेळी लोकांनी भारत माता की जय अशा घोषणा दिल्या. काबूल आंतरराष्ट्रीय विमानतळावरील परिस्थिती बिघडत चालली असल्यामुळे सोमवारी विमानांची उड्डाणे रद्द करण्यात आली होती. मात्र, अमेरिकी सैन्य दलाने परिस्थितीवर नियंत्रण मिळवल्यामुळे मंगळवारी पहाटेपासून विमानतळ सुरू झालं. यानंतर भारतीय विमानाने तिथून उडाण केलं. भारतीय हवाई दलाच्या विमानाचे फोटो प्रसिद्ध झाले आहेत. भारतीय नागरिकांना आपल्या देशात परत आणलं गेलं.

तालिबानचा अफगाणिस्तानवर ताबा; शांतता नोबेल विजेती मलालाची पहिली प्रतिक्रिया, म्हणाली...

नवी दिल्ली: अफगाणिस्तानवर तालिबानने संपूर्ण ताबा मिळवल्यानंतर युद्ध संपल्याची घोषणा केली आहे. अफगाणिस्तानात तालिबानचे राज्य परत आले आहे. तालिबानने रविवारी राजधानी काबूलवर ताबा मिळवला. यानंतर राष्ट्राध्यक्ष अशरफ घनी आणि अन्य राजकारण्यांनी देश सोडला आहे. यानंतर तालिबानच्या प्रवक्त्याने युद्ध संपल्याची घोषणा केली आहे.

या संपूर्ण रक्तरंजित धुमश्चक्रीवर शांततेचा नोबेल पुरस्कार जिंकलेल्या मलाला युसूफझईने आपली पहिली प्रतिक्रिया देत भूमिका स्पष्ट केली आहे. (malala yousafzai says we watch in complete shock as taliban take control of afghanistan)

तालिबानचा धोका, अपहरणाची भीती अन् संपत आलेले इंधन; Air India च्या विमानाचा १ तास थरार

अफगाणिस्तानच्या लोकांसाठी आणि मुजाहिद्दीनसाठी हा दिवस खूप मोठा आहे. २० वर्षांचे बलिदान आणि मेहनत फळाला आली आहे. अफगाणिस्तानमधील नवीन सरकारचे स्वरूप काय असेल, ते लवकरच स्पष्ट होईल. तालिबान संपूर्ण जगापासून दूर राहू इच्छित नाही आणि आम्हाला शांततापूर्ण आंतरराष्ट्रीय संबंध हवे आहेत, असे तालिबानचे प्रवक्ते मोहम्मद नईम यांनी म्हटले आहे. या एकूणच प्रकरणावर मलालाने आपली प्रतिक्रिया ट्विटरवरून मांडली आहे.

आम्हाला प्रचंड धक्का बसला

तालिबानने अफगानिस्तानवर ताबा मिळवल्याचे बघून आम्हाला प्रचंड धक्का बसला. मी तिथल्या महिला, अल्पसंख्य आणि मानवी अधिकार कार्यकर्त्यांविषयी खूप चिंतेत आहे. जागतिक, प्रादेशिक आणि स्थानिक सत्तांनी अफगाणिस्तानमध्ये तातडीने लक्ष घालावे अफगाणिस्तानमध्ये मानवतेच्या दृष्टीकोनातून मदत करावी आणि नागरिकांना व निर्वासितांना संरक्षण द्यावे, असे ट्विट मलालाने केले आहे.

'शांततापूर्ण हस्तांतर' करावे असे आवाहन

अफगाण सरकारने विनाशर्त शरण येऊन सत्तेचे 'शांततापूर्ण हस्तांतर' करावे असे आवाहन तालिबानी बंडखोरांनी केले होते. त्यानंतर एका व्हिडिओमध्ये तालिबानी लोक राष्ट्रपती भवनात बसलेले दिसत आहेत. तालिबानच्या एका नेत्याने बंडखोर वेगवेगळ्या प्रांतातून पुन्हा एकत्र येत आहेत आणि नवीन शासन संरचना तयार करण्यासाठी परदेशी सैन्य निघून जाण्याची वाट पाहत आहेत, असे सांगितले जात आहे. तसेच अफगाणांना दैनंदिन कामकाज पुन्हा सुरू करण्याची परवानगी देण्याचे आदेश देण्यात आले आहेत आणि नागरिकांना घाबरवण्यासाठी काहीही करू नका, असे आदेश तालिबानींना देण्यात आले आहेत.

दरम्यान, मलालाने देखील तालिबानशी दीर्घकाळ वैचारिक संघर्ष केला आहे. २०१२ मध्ये पाकिस्तानातील तालिबानचा माजी प्रवक्ता एहसानुल्लाह एहसानने मलालावर गोळी झाडली होती. त्यानंतर मलालाच्या संघर्षाला अधिक धार आली. २४ वर्षीय मलालाला २०१४ मध्ये नोबेल पारितोषिकाने सन्मानित करण्यात आले आहे. तिला नोबेल पुरस्कार देण्यात आले, त्यावेळी तिचे वय अवघे १७ वर्षे होते.

बृहन्मुंबई क्षेत्रातील उद्याने, मैदाने, चौपाट्या आणि समुद्रकिनारे नागरिकांसाठी खुले

मुंबईतील कोरोनाचा प्रादुर्भाव पूर्णपणे नियंत्रणात आल्यानंतर जनजीवन पूर्वपदावर आणण्यासाठी 'ब्रेक दि चेन' अंतर्गत करण्यात येत असलेल्या उपाययोजनांचा भाग म्हणून बृहन्मुंबई महानगर पालिका क्षेत्रातील सर्व उद्याने, मैदाने, चौपाट्या आणि समुद्रकिनारे आता सकाळी 6 ते रात्री 10 या वेळेत नागरिकांसाठी खुले राहणार आहेत. सार्वजनिक ठिकाणी वावरताना मास्कचा उपयोग, सुरक्षित अंतर आणि हातांची स्वच्छता यासह आवश्यक सर्व निर्देशांचे पालन करून महानगरपालिका प्रशासनास सहकार्य करावे, असे आवाहन महानगरपालिका आयुक्त इकबाल सिंह चहल यांनी केले आहे. मुंबई महानगरातील कोविड-19 संसर्गस्थिती सध्या नियंत्रणात आहे.

केंदीय मंत्री ना.कपिल पाटील यांच्या जनआशिर्वाद यात्रेचा श्रीगणेशा

ठाणे, प्रतिनिधी :- 

          पंतप्रधान नरेंद्र मोदी यांच्या संकल्पनेतून जनतेचा आशीर्वाद घेण्यासाठी केंद्रीय पंचायत राज्यमंत्री कपिल पाटील यांच्या जनआशिर्वाद यात्रेमुळे ठाणे जिल्हा भाजपामय बनला आहे. भारतीय जनता पार्टी ठाणे शहराच्या वतीने मंत्री कपिल पाटील यांचे जोरदार स्वागत करण्यात आले. यावेळी ठाण्याच्या वेशीवरून जन यात्रेला जोरदार सुरुवात झाली. ठाण्याचे नगरसेवक भरत चव्हाण आणि संजय वाघुले यांनी ना.कपिल पाटील यांच्या जनआशिर्वाद यात्रेचे जोरदार स्वागत केले असून पारंपारिक वेशभुषेतील आगरी कोळी बांधवांनी कोळी गीतांच्या ठेक्यावर नृत्य सादर करून ना. कपिल पाटील यांच्या यात्रेला शुभेच्छा दिल्या. यावेळी भारताच्या ७५ व्या स्वातंत्र्य दिनानिमित्त जेष्ठ नागरिकांनी कपिल पाटील यांना आशिर्वाद दिला..

           देशाचे पंतप्रधान नरेंद्र मोदी यांनी नुकताच केंद्रीय मंत्रिमंडळात महाराष्ट्रातील चार खासदारांचा समावेश केला आहे.केंद्रीय मंत्री नारायण राणे, राज्यमंत्री कपिल पाटील, भागवत कराड आणि भारती पवार या दिग्गज मंडळीच्या जनआशीर्वाद यात्रेला सोमवार १६ ऑगस्टपासून प्रारंभ झाला.ठाणे, आनंदनगर चेकनाक्यावर कोपरीचे एकमेव भाजप नगरसेवक भरत चव्हाण यांनी ना.कपिल पाटील यांच्या स्वागताची जय्यत तयारी केली होती.संपूर्ण पूर्वद्रुतगती महामार्गासह परिसर भाजपमय बनला आहे. यावेळी भारतीय जनता पक्षाचे आमदार संजय केळकर, भारतीय जनता पार्टीचे ठाणे शहर अध्यक्ष निरंजन डावखरे, माजी खासदार किरीट सोमय्या, संजीव नाईक, भाजपचे नेते कृपाशंकर सिंग, या कार्यक्रमाचे आयोजक भरत चव्हाण, संजय वाघुले, ओमकार चव्हाण, वृषाली वाघुले, नगरसेवक आणि कार्यकर्ते मोठ्या संख्येने उपस्थित होते. 

           सोमवारी पहिल्या दिवशी जनआशिर्वाद यात्रा ठाणे शहर, कळवा, मुंब्रा, डोंबिवली, कल्याण पूर्व येथून जाणार आहे. दुसऱ्या दिवशी १७ ऑगस्ट रोजी अलिबाग, रेवदंडा, पेण, पनवेल, उरण आणि नवी मुंबई परिसरातून यात्रा फिरेल. तिसऱ्या दिवशी १८ ऑगस्ट रोजी कल्याण शहर, शहाड, टिटवाळा, म्हारळ, उल्हासनगर, अंबरनाथ, बदलापूर शहरातील विविध भागातून यात्रा जाईल. चौथ्या दिवशी १९ ऑगस्ट रोजी मुरबाड, किन्हवली, शहापूर, भिवंडी शहरात यात्रा जाणार आहे. तर पाचव्या दिवशी २० ऑगस्ट रोजी भिवंडी तालुक्यात यात्रेची सांगता होईल.

चौकट 

जिल्याला मंत्रिपद देऊन मोदींनी ठाणे जिल्याचा वनवास संपवला - कपिल पाटील

       ठाणे जिल्ह्याला केंद्रात मंत्री पद दिले हे आपल्या जिल्ह्याचे भाग्य असून  पंतप्रधान नरेंद्र मोदी यांनी मंत्रिपद देऊन जिल्ह्याचा वनवास संपवला आहे. 

मंत्री झाल्यानंतर जनतेचा आशीर्वाद घ्या कामाला सुरुवात करा अशी मोदी यांनी सांगितल्या नंतर आम्ही जन आशीर्वाद यात्रेला सुरुवात केली. ही अभिमानाची गोस्ट असून हे माझे स्वागत नाही तर मोदींच्या विचारला सलाम आहे. मला मोदींनी  विकास कामे करण्यासाठी संधी दिली, मला जबाबदारी दिली आहे, ती जबाबदारी पूर्ण करणार असून याआधी भरकटलेल्या मार्गाचे चालत होतो, मात्र देवेंद्र फडणवीस यांनी दिशा दिली असून भारतीय जनता पार्टी माझे कुटूंब म्हणून मी काम करून दाखवेन. 

कपिल पाटील ( केंद्रीय पंचायत राज राज्यमंत्री)