एकनाथ खडसेंना सर्वात मोठा धक्का, एवढ्या कोटी रुपयांची संपत्ती जप्त

मुंबई | भोसरी MIDC मधील जमीन खरेदी प्रकरणात राष्ट्रवादीचे नेते आणि राज्याचे माजी महसूल मंत्री एकनाथ खडसे यांना सर्वात मोठा धक्का बसला आहे. सक्तवसुली संचलनालय अर्थात ईडीने खडसे यांची लोणावळा आणि जळगाव येथील मालमत्ता जप्त केली आहे.

या मालमत्तांची एकूण किंमत 5 कोटी 73 लाख रुपये असल्याची माहिती समजत आहे.

गेल्या काही दिवसांपासून एकनाथ खडसे आणि त्यांच्या कुटुंबियांची ईडीकडून कसून चौकशी सुरु आहे. एका प्रकरणात तर खडसे यांचे जावई गिरीश चौधरी यांना ईडीकडून अटक देखील करण्यात आली होती. त्यानंतर आता ईडीने एकनाथ खडसे यांच्या मालमत्तांच्या जप्तीची कारवाई केली आहे. यामध्ये एकनाथ खडसे यांच्या लोणावळा आणि जळगाव येथील मालमत्ताचा समावेश असून मनी लाँडरिंग प्रकरणात एकनाथ खडसेंची चौकशी केली जात असतानाच ही कारवाई करण्यात आली आहे.

ईडीच्या आरोपानुसार 2016 मध्ये महसूलमंत्री असताना खडसे आणि त्यांचे जावई गिरीश चौधरी यांनी पुण्यातील भोसरी येथे एक भूखंड खरेदी केला होता. हा भूखंड MIDC च्या मालकीचा होता. त्यावेळी या भूखंडाचा बाजारभाव 31 कोटी रुपये होता, मात्र अवघ्या 3 कोटी रुपयांमध्ये हा भूखंड विकत घेण्यात आला होता. खडसे यांनी स्वतःच्या अधिकारपदाचा गैरवापर केल्याचा आरोप यामुळेच केला जात आहे.

भोसरीतील भूखंड इतक्या कमी किंमतीत घेण्यासाठी व्यवहार कसा काय झाला? गिरीश चौधरी यांनी हा भूखंड विकत घेण्यासाठी गोळा केलेले 3 कोटी रुपये नेमके कुठून आले?, यासह इतर काही मुद्द्यांचा ईडीकडून तपास केला जात आहे. आगामी काळात या प्रकरणात ईडी काय कारवाई करणार हे पहावं लागेल.